Postulína kynnir nýja blómavasa 9 (Planet 9) sem minna á hnetti og eru innblásnir af hugmyndum sem settar hafa verið fram um nýjundu reikistjörnuna, 9. Vel má ímynda sér að upp úr líflausu yfirborði slíkrar plánetu skjótist líf, blóm upp úr eyðimörkinni, rétt eins og upp úr svörtum sandi sem finna má við strendur Íslands.

Segja má að blómavasarnir séu sjálfstætt framhald af blómapottaseriu Postulínu, Draumur um vor, sem sýnd var í fyrra á Hönnunarmars.

Eins og á við um fyrri verk Postulínu eru nýju vasarnir unnir á rennibekk. Að þessu sinni er unnið með kúluna, sem eins og allir vita er mikilvægt fagurfræðilegt grunnform.

Vatnslitamyndirnar sem með fylgja hafa einnig verið unnar á rennibekknum og þannig kannar Postulína möguleika vinnuaðferða sinna í nýjum miðlum.

Eva Aradóttir og Nina Nyman sýna á HönnunarMars í Epal, óhefðbundna kústinn Robin.

„Hönnunin er tilvalin til að sópa gólfið eftir daglegt amstur á heimilinu. En af hverju ekki að leyfa krökkunum að leika sér með hann?

Með því að snúa honum við breytist notagildi hans úr hinum hefðbundna kústi í ævintýralegan leikhest. Hugmyndin kveiknaði út frá því að oft fá börnin á heimilinu að leika sér með eldhúsáhöld sér til dundurs meðan forelrarnir sinna elhússtörfum, því fannst okkur tilvalið að hanna eitthvað sem tengir saman þessa tvo heima svo bæði börn og fullorðnir fá að njóta góðs af fallegri hönnun. Hárin eru að sjálfsögðu úr íslenskum hrosshárum en með kústinum fylgjir einnig litill viðarkambur til að sjá til þess að hárin haldist hrein og ryk frí. Kústurinn sjálfur er gerður úr hlyn.

Elsa Nielsen grafískur hönnuður sýnir verkefnið #einádag á HönnunarMars í Epal.

„Þann 1. janúar 2015 ákvað ég að skrásetja líf mitt með litlum trélitateikningum og rifja þannig upp gamla trétlitatakta. Ég teiknaði eina litla mynd á dag og deildi þeim á Instagram undir #einádag. Ég náði að klára heilt ár, eða 365 myndir, með hjálp þeirra sem fylgdust með að aðdáun. Ég ákvað í framhaldinu að nýta myndirnar og með því að hanna dagatal úr öllum myndunum sem hægt er að nota líka sem tækifæriskort. Eitt listaverk á dag í eitt ár!

Dagatalið er prentað á gæðapappír og kemur í kassa með 12 blokkum – ein blokk fyrir hvern mánuð. Í kassanum fylgja trönur sem hægt er að setja blokkirnar á. Svo rífur maður einn dag af í einu. Dagatalið er hægt að setja upp hvenær sem er því það er ekki tengt vikudögum né ártali. Dagatal fyrir fagurkera. Dagatalið fæst á íslensku, ensku og dönsku. Danska útgáfan er væntanleg í Illums Bolighus í danmörku í næsta mánuði.

Veggspjöld

Eftir að hafa teiknað allar 365 myndir sá ég að það er auðveldlega hægt að skipta þeim niður í nokkra flokka. Tilvalið að setja á veggspjöld til að fegra heimilið. Flokkarnir eru þessir: Uppáhalds, Heimilið, Leikgleði, Matur, Góðgæti og Náttúra. Til sýnis í Epal á HönnunarMars.

Sængurverasett

Allar 365 teikningarnar passa fullkomlega á eitt sængurver. Fallegt í hjónaherbergið eða barnaherbergið. Í fyrsta skipti til sýnis í Epal á HönnunarMars 2016.

Þetta skemmtilega trélita verkefni #einádag sem byrjaði smátt með einni lítilli mynd á pappírssnepil varð stærra en ég þorði nokkurn tíman að vona. Í janúar á þessu ári var ég útnefnd Bæjarlistamaður Seltjarnarness 2016 og voru allar orginal myndirnar til sýnis í Gallerí Gróttu í kjölfarið af útnefningunni. Einnig segji ég stolt frá því að ég átti fund með Illums Bolighus í danmörku sem vill fá dagatalið í verslunina sem fyrst og líklega veggspjöldin líka.“

Í tilefni 40 ára afmæli Epal voru 6 hönnuðir frá Íslandi og Danmörku fengnir til að hanna nýjar vörur útfrá íslenskum innblæstri. Í október 2015 dvöldu hönnuðurnir í fjóra daga á Listasetrinu Bæ þar sem þeir skiptust á hugmyndum, ræddu íslenska menningu og kynntust mismunandi hráefni. Verkefnið hlaut nafnið Bylgjur: undir íslenskum áhrifum og er núna hægt að kynna sér á HönnunarMars í Epal Skeifunni.

Hönnuðir voru þau: Margrethe Odgaard, Chris L. Halstrøm, Ragnheiður Ösp Sigurðardóttir, Ingibjörg Hanna, Sebastian Holmbäck og Ulrik Nordentoft.

Hér að neðan má sjá brot af verkunum sem sjá má á sýningunni en sjón er sögu ríkari.

Íslensk hönnun í sinni litríkustu mynd á HönnunarMars. 
Með þátttöku EPAL í HönnunarMars hefur opnast nýr gluggi að góðri hönnun.
Epal kynnir nýjar vörur sem er afrakstur samvinnu íslenskra og danskra hönnuða sem öll eiga það sameiginlegt að hafa náð langt í sínu fagi – þessi samvinna hefur fengið nafnið BYLGJUR: undir íslenskum áhrifum.
Sex framsæknir hönnuðir voru fengnir í tilefni 40 ára afmæli Epal til að hanna nýjar vörur úr íslensku hráefni og útfrá íslenskum innblæstri sem höfðar til alþjóðamarkaðar. Útkoman er fjölbreytt en þar má nefna gólfmottu, húsgögn, værðarvoð, trefla ásamt fleiru.
Epal mun einnig í ár sýna áhugaverða hönnun eftir fjölbreyttan hóp hönnuða, þekktra jafnt sem nýrra.
Haft hefur verið að leiðarljósi frá stofnun 1975 að auka skilning og virðingu fyrir hönnun á Íslandi með því að velja góða hönnun og gæðavörur fyrir viðskiptavini Epal. Hluti af því er þátttaka í HönnunarMars.