Kanilkort eru falleg tækifæriskort skreytt uppáhalds uppskriftunum og eru því tilvalin fyrir jólin: Súkkulaðibitasmákökur, Sara Bernhards & Laufabrauð. Kortin eru prentuð með letterpress prentaðferð á yndislegan bómullarpappír, en aðferðin sem er yfir fimmhundrum ára gömul var fundin upp af Jóhannesi Gutenberg. Kanilkortin eru prentuð hjá Reykjavík Letterpress, sem sérhæfa sig í þessu gamla handverki.
Fyrsta uppskriftin sem við viljum deila með ykkur eru smákökur með lakkrísdufti og lakkrísbitum frá hinum danska lakkrísframleiðanda Johan Bülow.
Hús Handanna á Egilsstöðum í samvinnu við Þorpið og austfirska listhandverksmenn standa nú að sýningu þar sem fimm endurgerðir af nytjahlutum sem tengjast Austurlandi eru sýndir í Á Skörinni, Austurstræti 10, Reykjavík. Um er að ræða tvo kunnuglega trékolla sem voru algeng eign á síðustu öld víða um land en í mismunandi formi og efni. Austfirsku kollarnir sem nú hafa verið endurgerðir hafa fengið nafnið Ömmukollur og Egilsstaðakollur. Það er Sigurður Ólafsson á Aðalbóli í Hrafnkelsdal sem framleiðir kollana í samvinnu við Epal.
Ömmukollurinn er smíðaður eftir fyrirmynd í eigu Sveinbjargar Hrólfsdóttur frá Reynihaga í Skriðdal og er þessi útgáfa sá kollur sem verður framleiddur og markaðssettur til að skapa nýjar minningar hjá ömmum nútímans.
Egilsstaðakollurinn var framleiddur frá 1954 á trésmíðaverkstæði Kaupfélags Héraðsbúa en var einnig árum saman skyldustykki í trésmíðum í Alþýðuskólanum á Eiðum. Egilsstaðakollurinn hefur nú verið endurgerður úr Hallormsstaðalerki.
Eik á Miðhúsum hefur síðstliðin ár framleitt endurgerð af gamla góða spítujólatrénu og einnig endurgerð af silfurhring frá víkingaöld sem fannst við Þórarinsstaði við Seyðsisfjörð árið 1999.
Möðrudalssnaginn er einnig með í för til höfuðborgarinnar en snaginn er endurgerð eftir snögum sem Jón Stefánsson frá Möðrudal smíðaði gjarnan úr þeim efnivið sem var aðgengilegur á Fjöllum. Afkomandi hans Hulda Eðvaldsdóttir nýtti sér sköpunargleði langafa síns og notaði snagann sem innblástur í hönnun á Gibba gibb snögum sínum. Í kjölfar sýningarinnar verður vefverslun Húss Handanna opnuð um 20 nóvember n.k. www.hushandanna.is
Sýningin mun standa til og með 20.nóvember.
Á Skörinni, Aðalstræti 10, 101 Reykjavík.
Danski húsgagnaframleiðandinn Eilersen á sögu sína að rekja allt aftur til ársins 1895 þegar hinn ungi Niel Eilersen starfaði sem hestakerrusmiður. Hann var sá fyrsti í Danmörku til að nota gufu til að beygja við, en þá aðferð notaði hann til að smíða kerruhjólin. Þegar sá tími kom að bílar tóku við af hestukerrum hóf Eilersen verksmiðjan að smíða sæti í bíla og rútur. En þegar að verksmiðjan brann til kaldra kola árið 1934 breyttust áherslur Eilersen algjörlega sem hóf þá að framleiða hágæða bólstruð húsgögn. Í dag rekur fjórða kynslóð Eilersen fjölskyldunnar verksmiðjuna sem einbeitir sér að hönnun og smíði á gæðasófum sem njóta mikilla vinsælda í dag um heim allann.
Um helgina (föstudag og laugardag) verða hjá okkur sérfræðingar frá Eilersen sem veita ráðgjöf og einnig verður boðið upp á 20% afslátt af öllum húsgögnum þeirra ásamt húsgögnum frá HAY.
Krúttlegar fígúrur og litríkur heimur Tulipop er sköpunarverk Signýjar Kolbeinsdóttur, teiknara og hönnuðar. Tulipop hefur þróað úrval að litríkum og skemmtilegum gjafavörum sem hafa vakið mikla lukku meðal barna og fullorðinna, en fyrstu vörur fyrirtækisins komu á markað í mars 2010. Nýjasta hönnunin frá Tulipop er fallegur lampi með mikinn karakter sem kallast Herra Tré og er hann hugsaður bæði fyrir börn sem fullorðna. Lampinn er nýkominn í Epal og kostar hann 12.500 kr.
Frábær íslensk hönnun!
Andreas Engesvik hannaði kertastjakana Allas fyrir Iittala sem komu út fyrr á þessu ári, en hann er fyrsti norski hönnuðurinn sem fenginn er til að hanna fyrir Iittala og þykir það mikill heiður. Hann hefur hlotið ýmis verðlaun fyrir verk sín svosem hönnunarverðlaun Wallpaper árið 2009 og iF hönnunarverðlaunin árið 2010 og nú síðast hin virtu Red Dot hönnunarverðlaun árið 2012 fyrir Allas kertastjakana. Fyrir utan Iittala hefur Andreas hannað fyrir Muuto, Asplund og Ligne Roset, og má finna hönnun eftir hann í norsku konungshöllinni.
Hann Oiva Toikka sem er eitt stærsta nafnið í finnskri hönnunarsögu hefur starfað fyrir Iittala í yfir 50 ár og það var árið 1972 þegar hann byrjaði að hanna frægu fuglana sína BIRDS BY TOIKKA. Fuglarnir eru allir munnblásnir í Nuutajarvi glerverksmiðjunni í Finnlandi þar sem Iittala hefur haft glerverkstæði sitt undanfarin hundrað ár. Það er teymi af 5 glerblásurum sem sjá um að koma lífi í fugla Toikka, en það tekur um 15 klukkustundir að búa til hvern fugl.
Fuglarnir eru gullfallegir og einstakir söfnunargripir þar sem að enginn þeirra er alveg eins.
Þessar fallegu myndir af ljósum framleiddum af Louis Poulsen voru teknar heima hjá dönsku listakonunni Tenku Gammelgaard og deilir hún þeim með lesendum sínum á bloggsíðu sinni hér. Myndir af heimili Tenku hafa birst víða í gegnum tíðina, en hún er þekkt fyrir að eiga afar smart heimili og ákvað Louis Poulsen ljósaframleiðandinn að nýta sér það sem fallegt umhverfi fyrir ljósin.
Ljósmyndir; JACOB TERMANSEN.
Á bloggsíðu Tenku má einnig sjá “bakvið tjöldin” myndir eins og þessar hér að neðan.
Fallegt heimili og flott ljós ekki satt?
Fleiri myndir er hægt að skoða Hér.
Breski hönnuðurinn Matt Pugh hannar og framleiðir húsgögn og smáhluti fyrir heimilið. Með það að leiðarljósi að hlutirnir eigi að endast lengur en heila lífstíð vinnur hann aðeins með náttúruleg og umhverfisvæn efni. Hönnun hans er tímalaus og einföld en þó með skemmtilegum smáatriðum og litum. Uglurnar frá Matt Pugh voru að koma í Epal og eru þær flottar stakar eða margar í hóp. 
Tímalaus, handgerð og falleg hönnun fyrir heimilið.
Tré sem Katrín Ólína hannaði ásamt Micheal Young árið 2004 nýtur enn mikilla vinsælda og má oft sjá það á fallegum heimilum þegar flett er í gegnum skandinavísk tímarit.
Tréið kemur í tveimur stærðum og tveimur útgáfum, til að festa á vegg og til að standa á gólfi.
